v9
V9BET

កីឡាករជើងចាស់ ស សី បង្ហាត់គុនខ្មែរដល់កូនរបស់ខ្លួន និង ក្មេងៗមួយចំនួននៅស្រុកមុខកំពូល

1 month ago​ | ដោយ V-Dr

កីឡាករគុនខ្មែរជើងចាស់ ស សី បាត់មុខពីសង្វៀនប្រដាល់តាំងពីពាក់កណ្ដាលឆ្នាំ ២០១៨ ម៉្លេះដោយផ្អែកលើវ័យកាន់តែជ្រេ កម្លាំងធ្លាក់ចុះ និង គ្រួសារផ្ទាល់ប្រាប់ថាឈប់វ៉ៃទៅកុំឲ្យខ្មាសក្មេងៗ ប៉ុន្តែ កីឡាករវ័យ ៣៧ ឆ្នាំរូបនេះកំពុងដុតដៃដុតជើងបង្ហាត់កូនប្រុសរបស់ខ្លួន និង ក្មេងៗមួយចំនួនក្នុងមូលដ្ឋាននៅភូមិ ស្វាយជ្រុំ ឃុំព្រែកដំបង ស្រុកមុខកំពូលខេត្តកណ្ដាល។

ការងាកមកបណ្ដុះបណ្ដាលយុវជនក្នុងវិស័យគុនខ្មែរគឺដោយសារក្ដីស្រលាញ់ និង រួមចំណែកអភិរក្សគុនខ្មែរហើយម្យ៉ាងទៀតភាពកើនឡើងនៃតម្លៃខ្លួនពីការឡើងរេញក៏ជាចំណែកមួយសម្រាប់ការជំរុញទឹកចិត្តនេះផងដែរ។ អតីតកូនសិស្សលោក អេ ភូថង បញ្ជាក់ថា ៖«ខ្ញុំចង់ឲ្យកូនខ្ញុំរៀន ផង និងហាត់ក្បាច់គុនប្រដាល់ផង។ កូនខ្ញុំឈ្មោះ សី កុសល់ ជាកូនទី២ អាយុ ១១ ឆ្នាំ រៀនថ្នាក់ទី៣។ ខ្ញុំបង្ហាត់កូនខ្ញុំ ប្រហែលជា ៥ ខែមកហើយ។ គេឆាប់ចេះ ឆាប់ចាំ ការវ៉ៃល្អ ប៉ុន្តែមិនទាន់ចេះប្រើទម្ងន់ដៃ ដៃគេនៅស្រាល តែវ៉ៃចេញបានលឿន។ ប្រហែលមួយ ឬ ពីរឆ្នាំទៀត បើរឹតតែល្អខ្ញុំនឹងស្វែងរកសង្វៀនឲ្យកូនខ្ញុំប្រកួត។ នេះជាឱកាសមួយដែលខ្ញុំបង្ហាត់កូនខ្ញុំ ព្រោះពីមុនតម្លៃខ្លួនតិចណាស់ មិនដូចឥឡូវទេឡើងរេញបានថ្លៃ ហើយ បើយើងខ្លាំង នោះតម្លៃខ្លួននឹងឡើងតាមហ្នឹងដែរ»។

កីឡាករដែលប្រឡូកលើសង្វៀនគុនចម្រុះបានចំនួន ៨ដងរូបនេះបានរៀបរាប់ទៀតថា ក្រៅពីកូនរបស់ខ្លួន លោកមានកូនសិស្សវ័យក្មេង ចំនួន ៧ នាក់ផ្សេងទៀតដែលកំពុងហាត់យ៉ាងសកម្ម។ ក្នុងនោះមានយុវជនគុនខ្មែរពីររូបអាយុ ១៧ និង ១៨ ឆ្នាំទទួលបានការបង្ហាត់ខ្លាំងក្លា និងត្រៀមចាប់គូឲ្យឡើងសង្វៀនទៀតផងនាពេលឆាប់ៗខាងមុខ ព្រោះថាសមត្ថភាពរបស់ពួកគេអាចឡើងវ៉ៃបានហើយ។

ដ្បិតជួបការលំបាកខ្លះៗលើការហ្វឹកហាត់ដោយសារតែខ្វះសម្ភារ ប៉ុន្តែលោកនៅតែក្រាញននាលក្នុងនាមជាគ្រូបង្វឹកដើម្បីលើកមុខមាត់នៅសហគមន៍របស់ខ្លួន និង ចង់ទទួលបានធនធានល្បីឈ្មោះកើតចេញពីស្រុកមុខកំពូលនៃទឹកដីខេត្តកណ្ដាល។ លោកសង្កត់ធ្ងន់ថា ៖«ខ្ញុំមានបាវសាក់មួយខ្ញុំទិញខ្លួនឯង ហើយសម្ភារមួយចំនួនបានពីលោកគ្រូ ហ៊ុន ច័ន្ទរាជ្យ នៃក្លិប Cambodian Top Team ផ្ដល់ឲ្យ ដូចជា ស៊ីប១គូ ហ្គង់សម្រាប់ក្មេងៗ ២គូ បង់រុំដៃ៣គូ ឧបករណ៍ពាក់ស្នងជើង២គូ និងកម្រាលហ្វឹកហាត់ជាដើម។ ប៉ុន្តែនៅខ្វះសម្ភារហាត់ជាច្រើនទៀតដូចជា សម្ភារសម្រាប់ធាក់ក្បាលពោះ និង ស៊ីបជាដើម។ យ៉ាងណាក្ដី យើងមានប៉ុណ្ណា គឺ ហាត់ប៉ុណ្ណឹងសិន ពេលណាខ្ញុំអាចលៃទិញបាន ខ្ញុំនឹងទិញបន្តបន្ទាប់ទៀត»។

ទោះបែបណាក៏ដោយ កីឡាករដែលទទួលចំណាត់ថ្នាក់លេខ៤ក្នុងកម្មវិធីប្រដាល់ខ្សែក្រវាត់នៅសង្វៀនស៊ីធីអិនកាល ១០ ឆ្នាំមុនបានដាក់គោលដៅមួយជាយូរមកហើយក្នុងការបង្កើតក្លិបប្រដាល់។ ឥឡូវនេះជិតចេញរូបរាង បន្ទាប់ពីទទួលលិខិតអនុញ្ញាតពីសហព័ន្ធកីឡាប្រដាល់គុនខ្មែរ ពោលរង់ចាំតែលិខិតបញ្ជាក់ពីភូមិឃុំតែប៉ុណ្ណោះ។ ប៉ុន្តែក្លិបប្រដាល់នេះមិនទាន់ដឹងថាដាក់ឈ្មោះអ្វីឲ្យប្រាកដនោះ ដោយរង់ចាំការពិភាក្សាសិន។ អតីតកូនសិស្សរបស់លោក ឈិត សារឹម បញ្ជាក់អំពីជំហរនៃការបង្កើតក្លិបយ៉ាងដូច្នេះ៖«ខ្ញុំចង់ឃើញកីឡាករល្អៗចេញពីភូមិឃុំរបស់ខ្ញុំ ហើយ ខ្ញុំរីករាយពេលពួកទទួលបានតម្លៃខ្លួនច្រើនទៅថ្ងៃអនាគតព្រោះឥឡូវនេះប្រដាល់មានទីផ្សារ ហើយមិនដូចខ្ញុំកាលពីជំនាន់ខ្ញុំទេ»។

គួរដឹងដែរថា ស សី មានស្រុកកំណើតនៅឃុំព្រែកដំបង ស្រុកមុខកំពូលខេត្តកណ្ដាល។ ថ្វីត្បិតចាប់អាជីពជាអ្នកប្រដាល់គុនខ្មែរតាំងពីថ្នាក់ទី ៥ ប៉ុន្តែ គេបានឡើងប្រកួតនៅសង្វៀនគុនចម្រុះចំនួន ៨ ដងក្នុងនោះ ឈ្នះ ៤ ដង និង ចាញ់ ចំនួន ៣ ដង គិតចាប់តាំងឆ្នាំ ២០១៦ មក។ បុរសកូន៤រូបនេះចាប់ផ្ដើមហ្វឹកហាត់ប្រដាល់ជាមួយគ្រូ ណុល នៅស្រុកមុខកំពូល, លោកគ្រូ សឹង សារិទ្ធ នៅក្លិបទ័ពជើងទឹក,គ្រូ អេ ភូថង នៅក្លិបអេភូថង និង គ្រូ ឈិត សារឹម នៅក្លិបក្រសួងការពារជាតិ មុនប្រកួតក្បាច់គុនចម្រុះនៅឆ្នាំ ២០១៦ ជាមួយគ្រូហ៊ុន ច័ន្ទរាជ្យ និង គ្រូបង្វឹកសញ្ជាតិអាមេរិក Fernando៕

កែសម្រួលដោយ៖ Cambosport
អត្ថបទ៖ ស៊ីធី

Loading...
ហាមដាច់ខាតការយកអត្ថបទ ពីវេបសាយ CAMBOSPORT.COM ដោយគ្មានការអនុញ្ញាត បើលោក លោកស្រី ត្រូវការអត្ថបទសូម INBOX នៅលើ Cambosport Facebook Page.