ពេលវេលាចេះតែកន្លងទៅសម្រាប់កីឡាករ Sergio Ramos ស្របពេលវ័យកាន់តែច្រើនណាស់ទៅហើយដែរចំពោះខ្សែការពារអន្តរជាតិអេស្បាញរូបនេះ។ បច្ចុប្បន្នស្ថិតនៅក្នុងវ័យ៣២ឆ្នាំអតីតខ្សែការពារក្រុម Sevilla រូបនេះ នៅតែបង្ហាញទម្រង់លេងបានល្អក្នុងនាមជាខ្សែការពារកណ្តាលម្នាក់ដែលបានជួយក្លឹបមានមូលដ្ឋាននៅរាជធានីប្រទេសអេស្បាញឈ្នះពានរង្វាន់ធំជាច្រើនមានដូចជាពានChampion League និង La Liga ជាដើម ។យ៉ាងណាមិញក្រុម Los Blancos រឺអធិរាជស Real Madrid កំពុងសំលឹងមើលបេក្ខភាពកីឡាករ ៥រូប ដែលមានសមត្ថភាពជំនួសតំណែង​Ramos នាកីឡាដ្ឋាន Estadio Santiago Bernabeu បាន។ កីឡាករទាំង ៥នាក់នេះត្រូវបានគេហទំព័រ Fox Sport Asia ដកស្រង់យកមកចុះផ្សាយៈ

១. Milan Skriniar (Inter Milan)

Skriniar ខ្សែការពារកណ្តាលវ័យ២៣ឆ្នាំសញ្ជាតិសូវ៉ាគីរូបនេះគឺជាកីឡាករល្អបំផុតម្នាក់នៅក្របខណ្ឌ SerieA នាពេលបច្ចុប្បន្ន។ ជាមួយសមត្ថភាពនិងអាយុទើបតែ ២៣ឆ្នាំអតីតកីឡាករក្រុម Sampdoria រូបនេះពិតជាមានតម្លៃថ្លៃគួរសមផ្អែកលើទេពកោសល្យរបស់គេដែលពិតជាគួរកោតសរសើរ។

២. Kalidou Koulibaly (Napoli)

កីឡាករដើមកំណើតបារាំង ប៉ុន្តែបច្ចុប្បន្នមានសញ្ជាតិសេណេហ្គាល់វ័យ២៧ឆ្នាំរូបនេះ ជាកីឡាករល្អបំផុតម្នាក់នៅក្របខណ្ឌលីកកំពូលអ៊ីតាលីនាពេលបច្ចុប្បន្ន។ ជាមួយនិងភាពឆ្លាតវៃ និងបិនប្រសព្វ ធ្វើអោយរូបគេត្រូវបានក្លឹបជាច្រើន មានមហិច្ឆតាចង់បានរូបគេមករួមក្រុមជាច្រើននាពេលកន្លងមក ដូច្នេះតម្លៃខ្លួនរបស់ Koulibaly អាចនិងថ្លៃជាងខ្សែការពារមានកំណត់ត្រាថ្លៃបំផុតលើពិភពលោកគឺ Virgil Van Vijk របស់ក្រុម Liverpool ទៅទៀត។

៣. Marquinhos (PSG)

គោលនយោបាយបច្ចុប្បន្នរបស់ក្លិប Real Madrid គឺត្រូវចុះហត្ថលេខាលើកីឡាករវ័យក្មេងដែលមានសក្តានុពលខ្ពស់។ ក្នុងន័យនេះខ្សែការពារអន្តរជាតិប្រេស៊ីល Marquinhos របស់ក្លឹប PSG ជាគោលដៅសក្តិសមបំផុតព្រោះ រូបគេមានអាយុត្រឹមតែ ២៤ឆ្នាំប៉ុណ្ណោះ ហើយបានឆ្លងកាត់បទពិសោធន៏ច្រើនដូចមិត្តរួមក្រុមនិងរួមជាតិ Thiago Silva។ ទោះបីជាយ៉ាងណា Marquinhos មានតម្លៃថ្លៃដូចជា Koulibaly ប្រសិនក្លឹប Real Madrid ចង់ចុះហត្ថលេខាយកមករួមក្រុម។

៤. Matthijs De Ligt (Ajax)

Matthijs De Ligt បានអភិវឌ្ឍខ្លួនជាកីឡាករលំដាប់ថ្នាក់ពិភពលោកដូច Kylian Mbappe ដែលបានឈ្នះពានរង្វាន់ Golden Boy សម្រាប់កីឡាករមានវ័យក្រោម២១ឆ្នាំ (U21) នៅក្នុងពិភពលោក។ កីឡាករខ្សែការពារអន្តរជាតិហូឡង់រូបនេះបច្ចុប្បន្នមានវ័យ ១៩ឆ្នាំគឺជាប្រធានក្រុម Ajax ផងដែរ។ De Light គឺជាកីឡាករមានកេរ្តិ៍ឈ្មោះនិងសមត្ថភាពដែលសក្តិសមបំផុតសម្រាប់ក្រុម Real Madrid សម្រាប់ពេលខាងមុខ។ ទោះយ៉ាងណារូបគេក៏ទទួលបានចាប់អារម្មណ៏ខ្លាំងពីសំណាក់ក្រុមប្រជែងលីកគឺ Barcelona នៅរដូវក្តៅកន្លងមកនេះផងដែរ។

៥. Eder Militao

កីឡាករចុងក្រោយនេះគឺ Eder Militao។ កីឡាករអន្តរជាតិប្រេស៊ីលវ័យ២១ឆ្នាំរូបនេះមានទំនាក់ទំនងក្នុងការចុះ ហត្ថលេខានាំយកមកពង្រឹងក្រុម Real Madrid នៅពេលទីផ្សារដោះដូរកីឡាករដំណើរការប៉ុន្តែ ប៉ុន្តែបានជួបផលវិបាកមួយចំនួន និងពន្យារពេលកិច្ចព្រមព្រៀងនេះ។ Militao ត្រូវរំពឹងថានឹងចូលរួមក្នុងរដូវក្តៅខាងមុខនេះ ស្របពេលតម្លៃខ្លួនទិញផ្តាច់កុងត្រារបស់អតីតកីឡាករក្រុម Sao Paolo រូបនេះ គឺមិនច្រើនជាងកីឡាករ ៤រូបខាងលើទេគឹ ៥០លានអ៊ឺរ៉ូតែប៉ុណ្ណោះ។

កែសម្រួលដោយ៖ Cambosport
ប្រភព៖ foxsportsasia