v9

Chelsea បំពេញការចុះហត្ថលេខាជាមួយ Kepa ក្នុងតម្លៃខ្លួនជាកំណត់ត្រាពិភពលោក

4 months ago​ | ដោយ V-Dara

Kepa Arrizabalaga បានក្លាយជាអ្នកចាំទីមានតម្លៃខ្លួនថ្លៃជាងគេបំផុតក្នុងពិភពលោក កាលពីថ្ងៃពុធ ក្រោយពីបានបំពេញការផ្ទេរក្នុងតម្លៃខ្លួន ៨០លានអឺរ៉ូ (ស្មើនឹង៩២,៩លានដុល្លារអាមេរិក) ពីក្លិប Athletic Bilbao ទៅកាន់ Chelsea ខណៈដែលកីឡាករវ័យក្មេងរបស់អេស្ប៉ាញរូបនេះ បានចុះហត្ថលេខារយៈពេល៧ឆ្នាំដើម្បីជំនួសកន្លែងរបស់ Thibaut Courtois នាកីឡដ្ឋាន Stamford Bridge។

ខ្សែបម្រើអន្តរជាតិក្រូអាស៊ី Mateo Kovacic នឹងចូលរួមជាមួយនឹង Kepa នៅឯក្លិប Chelsea ក្រោយពីរូបគេបានបំពេញការផ្ទេរក្នុងលក្ខខណ្ឌខ្ចីជើងពីក្លិប Real Madrid។ តម្លៃខ្លួនសម្រាប់ Kepa នឹងបំបែកកំណត់ត្រាកាលពីមុនសម្រាប់អ្នកចាំទីម្នាក់ក្នុងតម្លៃខ្លួន៦៦,៩លានផោន (ស្មើនឹង៨៦លានដុល្លារអាមេរិក) ដែលក្លិប Liverpool បានចំណាយទិញអ្នកចាំទីអន្តរជាតិប្រេស៊ីល Alisson ពីក្លិប Roma កាលពីខែមុន។

អ្នកចាំទីអន្តរជាតិអេស្ប៉ាញរូបនេះ អាចនឹងធ្វើការបង្ហាញខ្លួនជាលើកទី១របស់គេក្នុងការប្រកួតបើករដូវកាលនៃក្របខ័ណ្ឌ Premier League នៅលើទឹកដីក្រុម Huddersfield នៅថ្ងៃសៅរ៍នេះ។ Real ដែលនឹងប្រកាសពីការនាំយក Courtois នៅរសៀលថ្ងៃព្រហស្បតិ៍%នេះ ស្ទើរតែបានបំពេញនាំយក Kepa ក្នុងតម្លៃខ្លួន ២០លានអឺរ៉ូ កាលពី៧ខែមុនទៅហើយ។ Kepa បានឲ្យដឹងថា៖ «វាជាការសម្រេចចិត្តដ៏សំខាន់មួយសម្រាប់ខ្ញុំ សម្រាប់អាជីពរបស់ខ្ញុំ និងសម្រាប់ជីវិតផ្ទាល់ខ្លួនរបស់ខ្ញុំ។ កត្តាជាច្រើនបានទាក់ទាញខ្ញុំមកកាន់ក្លិបនេះ ដូចជាលរាល់ពានដែលក្លិបនេះបានឈ្នះ កីឡាករផ្សេងទៀត ទីក្រុងនេះ និងករ្បខ័ណ្ឌអង់គ្លេស Premier League»៕

កែសម្រួលដោយ៖ Cambosport
ប្រភព៖ TheGuardian

Loading...
ហាមដាច់ខាតការយកអត្ថបទ ពីវេបសាយ CAMBOSPORT.COM ដោយគ្មានការអនុញ្ញាត បើលោក លោកស្រី ត្រូវការអត្ថបទសូម INBOX នៅលើ Cambosport Facebook Page.