v9

FIFA រៀបចំការពិភាក្សាជាមួយអេស្ប៉ាញ ជុំវិញក្តីបារម្ភ ក្នុងដកសិទ្ធិមិនឲ្យទៅ World Cup

4 months ago​ | ដោយ V-Dara

សហព័ន្ធកីឡាបាល់ទាត់អន្តរជាតិហៅកាត់ថា FIFA និងរដ្ឋាភិបាលអេស្ប៉ាញ បានទទួលស្គាល់កាលពីថ្ងៃចន្ទ «ពីភាពចាំបាច់ក្នុងការជម្រះស្ថានភាពផ្សេងៗឲ្យបានឆាប់» តាមដែលអាច ទាក់ទងនឹងសហព័ន្ធកីឡាបាល់ទាត់របស់ប្រទេសនេះ (RFEF) ដើម្បីគេចឲ្យផុតពីការជាប់ពិន័យមិនឲ្យចូលរួមក្នុងព្រឹត្តិការណ៍ World Cup។

អង្គភាពគ្រប់គ្រងកីឡាបាល់ទាត់ពិភពលោកមួយនេះ បានធ្វើការព្រមានដល់សហព័ន្ធកីឡាបាល់ទាត់អេស្ប៉ាញ កាលពីខែធ្នូថា ពួកគេអាចនឹងរងការព្យួរពីយុទ្ធនាការ World Cup នៅប្រទេសរុស្ស៊ី ឆ្នាំ២០១៨ ដោយសារតែការចូលអន្តរាគមន៍របស់រដ្ឋាភិបាលអេស្ប៉ាញ។ បញ្ហានេះ បានផ្ទុះឡើងកាន់តែខ្លាំង ក្រោយពីលោក Angel Maria Villar ប្រធាន RFEF ត្រូវបានបង្ខំឲ្យលាលែងពីតំណែងកាលពីឆ្នាំមុន ក្រោយពីបានដឹកនាំក្នុងតួនាទីនេះចាប់តាំងពីឆ្នាំ១៩៩៨ បន្ទាប់ពីការឃាត់ខ្លួនរបស់លោកក្នុងផ្នែកនៃការស៊ើបអង្កេតលើបញ្ហាពុករលួយ។

លោកត្រូវបានគេឃុំខ្លួនកាលពីខែកក្កដា ក្រោមការចោទប្រកាន់ពីបទឃុបឃិត បន្លំ និងកែប្រែឯកសារផ្សេងៗ និងបានចំណាយពេល២សប្តាហ៍ក្នុងមន្ទីរឃុំឃាំង នៅមុនពេលត្រូវបានដោះលែងដោយការបង់ប្រាក់ធានាខ្លួន។ ទោះបីជាយ៉ាងណា ក្រុមប្រឹក្សាកីឡារបស់អេស្ប៉ាញ បានបញ្ជាក់ថា ការបោះឆ្នោតជ្រើសរើសប្រធានថ្មីរបស់សហព័ន្ធកីឡាបាល់ទាត់អេស្ប៉ាញ បានធ្វើឲ្យ FIFA ចាប់អារម្មណ៍ទៅលើការលូកដៃផ្នែកនយោបាយ។ កាលពីថ្ងៃចន្ទ លោក Fatma Samoura អគ្គលេខាធិការរបស់ FIFA បានជួបជាមួយនឹងរដ្ឋមន្ត្រីកីឡារបស់អេស្ប៉ាញលោក Mendez de Vigo ក្នុងទីក្រុងម៉ាឌ្រីដ រួមជាមួយនឹងលោក Jose Ramon Lete ប្រធានក្រុមប្រឹក្សាកីឡារបស់អេស្ប៉ាញ និងលោក Juan Luis Larrea ប្រធានបណ្តោះអាសន្នរបស់ RFEF៕

កែសម្រួលដោយ៖ Cambosport
ប្រភព៖ Worldsoccertalk

ហាមដាច់ខាតការយកអត្ថបទ ពីវេបសាយ CAMBOSPORT.COM ដោយគ្មានការអនុញ្ញាត បើលោក លោកស្រី ត្រូវការអត្ថបទសូមទំនាក់ទំនងមកកាន់លេខៈ 093 77 93 77