v9
V9BET

Man United កាត់បន្ថយសម្ពាធលើលោក Mourinho ខណៈ Liverpool ផ្តួល Burnley

2 years ago​ | ដោយ V-Dr

ក្រុម Manchester United បាននាំយកស្នាមញញឹមមួយដាក់លើផ្ទៃមុខរបស់លោក Jose Mourinho វិញ ខណៈដែលគ្រាប់បាល់ស៊ុតបញ្ចូលទីយ៉ាងល្អពីសំណាក់កីឡាករ Anthony Martial និង Jesse Lingard បានជួយឲ្យពួកគេទទួលជ័យជម្នះ ២-០ លើក្រុម Everton ស្របពេលដែលក្រុម Liverpool បានវាយសម្រុកនៅជិតបញ្ចប់ការប្រកួតដើម្បីកត់ត្រាជ័យជម្នះ ២-១ លើក្រុម Burnley កាលពីថ្ងៃចន្ទ។

Martial បានចូលលេងក្នុងជម្រើសទាំង ១១នាក់ដំបូងជំនួសកន្លែងរបស់ខ្សែប្រយុទ្ធ Romelu Lukaku ហើយកីឡាករវ័យក្មេងរបស់ Man United រូបនេះ បានរកគ្រាប់បាល់បើកឆាកនៅនាទី ទី៥៧ នាកីឡដ្ឋាន Goodison Park នៅមុនពេលខ្សែបម្រើស្លាប Lingard បំពេញជ័យជម្នះយ៉ាងកក់ក្តៅឲ្យក្រុមរបស់ខ្លួនជាមួយនឹងគ្រាប់បាល់បញ្ចូលទីយ៉ាងល្អនៅនាទី ទី៨១។ វាគឺជាជ័យជម្នះយ៉ាងកក់ក្តៅមួយសម្រាប់លោក Mourinho ស្របពេលមានព័ត៌មានថា អ្នកចាត់ការទូទៅរបស់ក្រុម Man United កំពុងតែបាត់បង់ការគាំទ្រពីកីឡាកររបស់លោក ក្រោយពីបានធ្វើការរិះគន់ពួកគេ «ធ្វើដូចជាកូនក្មេង និងមិនមានភាពចាស់ទុំ» ហើយលោកបានទទួលស្គាល់ថា ក្រុមនេះត្រូវការការបណ្តាក់ទុនបន្ថែមទៀតដើម្បីតាមឲ្យទាន់ក្រុម Man City។

Man United បានឡើងទៅឈរក្នុងចំណាត់ថ្នាក់លេខ២ វិញ ក្នុងក្របខ័ណ្ឌ Premier League វិញ ក្រោយពីបញ្ចប់ការខកចិត្តនៃការទទួលបានលទ្ធផលស្មើ៣លើកជាប់ៗគ្នា។ Man United កំពុងតែដេញតាមពីក្រោយក្រុម Man City ១២ពិន្ទុ ខណៈដែលក្រុមកំពុងតែនាំមុខមួយនេះ នឹងត្រូវធ្វើជាម្ចាស់ផ្ទះទទួលក្រុម Watford នៅរាត្រីថ្ងៃអង្គារនេះ និងនាំមុខ ២ពិន្ទុលើក្រុម Chelsea ដែលនឹងត្រូវប្រកួតជាមួយនឹងក្រុម Arsenal នៅថ្ងៃពុធ។ ស្របពេលជាមួយគ្នានេះ Liverpool ដណ្តើមបាន ៣ពិន្ទុពេញ ពេលប៉ះក្រុមខ្លាំង Burnley បើទោះបី Philippe Coutinho និង Mohamed Salah បានអវត្តមានដោយសារតែបញ្ហារបួសភ្លៅ និងក្រលៀនរៀងៗខ្លួនក៏ដោយ៕

កែសម្រួលដោយ៖ Cambosport
ប្រភព៖ Channel News Asia

Loading...
ហាមដាច់ខាតការយកអត្ថបទ ពីវេបសាយ CAMBOSPORT.COM ដោយគ្មានការអនុញ្ញាត បើលោក លោកស្រី ត្រូវការអត្ថបទសូម INBOX នៅលើ Cambosport Facebook Page.