v9

ក្រុមប៉េតង់កម្ពុជា ឈ្នះមេដាយមាស៣ សំរឹទ្ធ២ ពីការប្រកួតជើងឯកអាស៊ី នៅថៃ

10 months ago​ | ដោយ V-Dara

ក្រុមប៉េតង់កម្ពុជា បានឈ្នះមេដាយមាសចំនួន៣ និងមេដាយសំរឹទ្ធចំនួន២ទៀត ពីការប្រកួតកីឡាប៉េតង់កម្រិតអាស៊ី ដែលមានឈ្មោះថា 1st Asian Boules Sport Confederation Petanque Championship 2017(ABSC) ដើម្បីឈរនៅចំណាត់ថ្នាក់លេខ២បន្ទាប់ពីម្ចាស់ផ្ទះថៃ។

តាមរយៈការប្រកួត៤ថ្ងៃ នៅទីក្រុងបាងកក ហើយបានបញ្ចប់កាលពីយប់ថ្ងៃចន្ទ ម្សិលមិញ កីឡាករ ឃួន លីហ័រ បានឈ្នះមេដាយមាសឲ្យកម្ពុជា មុនគេ លើវិញ្ញាសាវាយយកពិន្ទុផ្នែកយុវជន បន្ទាប់ពីរូបគេបានបន្តយកឈ្នះលើកីឡាកររបស់ម៉ាឡេស៊ី ៣៦-២៩ ក្នុងការប្រកួតផ្តាច់ព្រ័ត្រ កាលពីថ្ងៃអាទិត្យ។

បន្ថែមលើនេះ ឃួន លីហ័រ បានសហការជាមួយមិត្តរួមក្រុមចំនួន៣នាក់ទៀត រួមមានកីឡាករ ហៀប វ៉ាឃីម, កុយ សុភក្រ្តា និង កែវ ភក្តី (បម្រុងម្នាក់) ក្នុងការឈ្នះមេដាយមាស លើវិញ្ញាសាប្រកួតជាក្រុម បន្ទាប់ពីពួកគេបានក្រុមថៃ ១៣-៧ ក្នុងវគ្គផ្តាច់ព្រ័ត្រ បន្ថែមទៅលើការទម្លាក់ក្រុមវៀតណាម ជាមួយការឈ្នះ ១៣-៧ ក្នុងវគ្គពាក់កណ្តាលផ្តាច់ព្រ័ត្រ កាលពីម្សិលមិញនោះ។

ចំណែក ក្រុមបុរសរបស់កម្ពុជា ដែលមានម្ចាស់មេដាយមាសពិភពលោក សុខ ច័ន្ទមាន, ថោង ឈឿន, យ៉ា ច័ន្ទដារ៉ារិទ្ធ និងកីឡាករ ឃីម សុភក្រ្ត (បម្រុងម្នាក់) បានយកឈ្នះក្រុមម៉ាឡេស៊ី ១៣-៣ ក្នុងវគ្គពាក់កណ្តាលផ្តាច់ព្រ័ត្រ រួចបានបន្តយកឈ្នះក្រុមថៃ ១៣-៩ ក្នុងវគ្គផ្តាច់ព្រ័ត្រ ដើម្បីឈ្នះបានមេដាយមាសទី៣ ឲ្យកម្ពុជា។

កីឡាករ សុខ ច័ន្ទមាន ក៏បានឈ្នះមេដាយសំរឹទ្ធ ក្នុងការប្រកួតវិញ្ញាសាវាយយកពិន្ទុ កាលពីថ្ងៃអាទិត្យ ផងដែរ បន្ទាប់ពីរូបគេបានចាញ់កីឡាករថៃជាមួយពិន្ទុ ៤៤ ទល់នឹង៣៣ នោះ។ រីឯម្ចាស់មេដាយមាសពិភពលោក អ៊ុក ស្រីមុំ បានឈ្នះមេដាយសំរឹទ្ធ លើវិញ្ញាសាវាយយកពិន្ទុនេះដែរ ព្រោះកីឡាការិនីជើងចាស់រូបនេះ បានចាញ់កីឡាការិនីចិនជាមួយពិន្ទុ ៣១-២៧។

ប៉ុន្តែការប្រកួតជាក្រុមនារីរបស់កម្ពុជា ដែលមានម្ចាស់មេដាយមាស៣សម័យកាល កែ ឡេង, អ៊ុក ស្រីមុំ, អ៊ុន ស្រីយ៉ាណ និងកីឡាការិនី ដួង ឌីណា(បម្រុងម្នាក់) មិនដណ្តើមបានមេដាយទេ ព្រោះបានចាញ់ក្រុមនារីរបស់ថៃ ១៣-០ ក្នុងវគ្គខ្វែង៨ក្រុមចុងក្រោយ។

យោងតាមលទ្ធផលនៃការប្រកួតនេះ កម្ពុជា បានឈ្នះមេដាយមាស៣ និងសំរឹទ្ធ២ គឺតិចជាងម្ចាស់ផ្ទះថៃ ដែលឈ្នះបានមេដាយមាស៣ ប្រាក់២ និងសំរឹទ្ធ៤ ក្នុងការប្រកួតទាំង៦វិញ្ញាសា ក្នុងព្រឹត្តិការណ៍នេះ។ រីឯក្រុមវៀតណាម ឈរនៅចំណាត់ថ្នាក់លេខ២ ដោយឈ្នះបានមេដាយប្រាក់២ សំរឹទ្ធ២ គឺច្រើនជាងប្រទេសម៉ាឡេស៊ី ដែលឈ្នះបានមេដាយប្រាក់១ សំរឹទ្ធ១ ប្រទេសចិន ឈ្នះបានមេដាយប្រាក់១ ហើយក្រុមប៉េតង់មកពីប្រទេសឥណ្ឌា និងជប៉ុន ឈ្នះបានមេដាយសំរឹទ្ធ១ ដូចគ្នា៕

Loading...
ហាមដាច់ខាតការយកអត្ថបទ ពីវេបសាយ CAMBOSPORT.COM ដោយគ្មានការអនុញ្ញាត បើលោក លោកស្រី ត្រូវការអត្ថបទសូម INBOX នៅលើ Cambosport Facebook Page.